ჩემს თვალწინ ცემეს ჩემი ადვოკატი ია სარანაშვილი,-თამაზ ელიზბარაშვილი

• ნახვები278
• ლაიქები0
• რეიტინგი12345

        ცნობილი ბიზნესმენი , ცხოველთა უფლებების დამცველი  და ძაღლების თავშესაფრის დამფუძნებელი,თამაზ ელიზბარაშვილი ციხიდან წერილს აქვეყნებს, მედია პორტალი “ჯეო დაიჯესტი” მას უცვლელად გთავაზობთ : 

         “ჩემო გულშემატკივრებო , დღეს 29 სექტემბერს მეორე დღეა რაც ვშიმშილობ, გლდანის ციხის N:53 სამარტოვე საკანში, სადაც არც ტელევიზორი, არც რადიო და არც ჟურნალ-გაზეთები არ მაქვს. ჩემი მოთხოვნაა :

1. მომცენ უფლება დავრეკო დედასთან.

2. ⁠გამიკეთონ ოპერაცია მარჯვენა მუხლზე, რომელიც იმ ავადსახსენებელ დღეს, 30 აგვისტოს დამიზიანა შაკო კუჭაშვილმა.

3. ⁠დაუბრუნონ ჩემს მეუღლეს მობილური ტელეფონი, რაც გამომძიებელმა ამოიღო ჩემი მანქანიდან.

4. ⁠დაიწყოს ჩემს მიერ 30 აგვისტოს განხორციელებული ფიზიკური ძალადობისა და მუქარის ფაქტზე გამოძიება.

მოგეხსენებათ 30 აგვისტოს საღამოს რესტორან “სხვაში” TV-იმედის შვიდმა ტიტუშკამ:

1. ჯაბა ხუბუამ, 40წლის.

2. ⁠გიორგი ჯანეზაშვილმა, 36 წლის.

3. ⁠ნიკა კლდიაშვილმა, 23წლის.

4. ⁠ალექსანდრე გამსახურდიამ, 32 წლის.

5. ⁠ნიკა აფციაურმა, 28წლის.

6. ⁠შაკო კუჭაშვილმა , 25წლის.

7. ⁠ჯემალ გოგმაჩაძემ, 23წლის.

მე თამაზ ელიზბარაშვილს და ჩემ მეუღლეს მოგვაყენეს შეურაცყოფა, მე ფიზიკურად შემეხნენ, 15წუთი ჩამკეტეს რესტორნის მე-2 სართულის კორიდორში და არ მიშვებდნენ ზედა სართულზე მეუღლესთან. იმის მაგივრად რო ეს შვიდი მოძალადე დაესაჯა მარლთმსაჯულებას პირიქით მე დამაპატიმრეს და უკვე ერთი თვეა გლდანის ციხის უდანაშაულო პატიმარი ვარ .

TV-იმედის ამ შვიდ ტიტუშკის მფარველებმა, გამოძიებას უბრძანა, რომ რაც შეიძლება მეტი ეტკინათ ჩემთვის და გავემწარებინე. 30-ზე მეტი მილიციელი მომისიეს, გამიჩხრიკეს სახლი , ჩემი პატარა 11-ე შვილის , 8თვის ნიკოლოზის სათამაშოები დაჭრეს და გამოშიგნეს, ჩემს თვალწინ ცემეს ჩემი ადვოკატი ია სარანაშვილი. გაჩხრიკეს 84 წლის ლოგინად ჩავარდნილი დედის სახლი, ლოგინიდან ხელით აწიეს , გადმოაწვინეს გვერდით ტახტზე და მისი საწოლი ამოატრიალეს, იქ რას ეძებდნენ ეს “დოქსოპულოები”?!

ტვ-იმედის ტიტუშკების მფარველების ბრძანებით ხელბორკილები ბოლომდე ჩამაჭირეს და 8საათი ასე მაწამეს, ტკივილს ვერ გავუძელი და გონება დავკარგე. გონზე მოსულს, პოლიციის თბილისის სამმართველოს შენობის ზედა სართულის ოთახში, ჩემი 8 თვის შვილის, ნიკოლოზის ტირილის ხმის იდენტური ხმა მასმენინეს. ფსიქოლოგიური ტერორი მომიწყეს. გლდანის ციხეში გამომამწყვდიეს და სანამ 8 დღე არ ვიშიმშილე მოთხოვნით, რომ დავეკითხე გამომძიებელს, მანამდე არ დამკითხა. დიახ დაპატიმრებიდან მე-16 დღეს დამკითხა გამომძიებელმა ლევან ჩხიკვაძემ. ჩემს საყვედურზე, ამდენი ხანი რატო არ დამკითხეთ და აუცილებელი იყო რომ მეშიმშილა დაკითხვის მოთხოვნით თქო? -გამომძიებელმა ვერაფერი მიპასუხა. დაკითხვის შემდეგ 16 სექტემბერს გამომძიებელმა მითხრა , რომ მე ამიკრძალა დარეკვა გარე სამყაროსთან, მათ შორის ავადმყოფ დედასთან. TV-იმედის ამ შვიდი ტიტუშკის მფარველებმა, აი ასეთი ბოროტება დაავალეს გამომძიებელს და მაინც წარმატებით შეასრულა ტიტუშკების მფარველების დავალება.

30 აგვისტოს რესტორან “ სხვაში” საღამოს შაკო კუჭაშვილმა მარჯვენა საოპერაციო მუხლში ფეხი ჩამარტყა და ისედაც დაზიანებული მუხლის მენისკი უფრო დაზიანდა. მაქვს საშინელი ტკივილები და საოპერაციოა, მაგრამ გლდანის ციხის მთავარი ექიმი, სავარაუდოდ TV- იმედის ტიტუშკების მფარველების ბრძანებას ასრულებს და აი ასეთი საშინელი ტკივილებით მაწამებს.

ჩემი მეუღლის მობილურ ტელეფონს, რომელიც მილიციელებმა ამოიღეს ჩემი ავტომობილიდან, არ უბრუნებენ. ამ ტელეფონში აქვს ჩემ მეუღლეს ჩემი მცირეწლოვანი შვილების ექიმთან ვიზიტისა და აცრების გრაფიკი, მობაილ ბანკის აპლიკაცია, ბავშვების სკოლის გაკვეთილებისა თუ პრეზენტაციის შესახებ ინფორმაცია, ბავშვებისა და ოჯახის ვიდეო თუ ფოტი არქივები.

მე დღეს გლდანის ციხის სამარტოვე საკნიდან ვებრძვი TV- იმედის ბოროტი ტიტუშკების მფარველებს და ჩემი იარაღი ამ უთანასწორო ბრძოლაში არის ჩემი მამაცი გული. დიახ მხოლოდ ჩემი მამაცი და უშიშარი გულის შეეშინდათ ამ პატარა ბოროტ შვიდ TV- იმედის ტიტუშკას და მათ მფარველებს და აი ეს სამარცხვინო საჩივარი შეიტანეს “მილიციაში” სასწრაფოდ დაიჭირეთ ელიზბარაშვილი, მარტომ, უიარაღომ ძალიან შეგვაშინა და ჩავისვარეთო და ჩადგა სახელმწიფო სტრუქტურები რუსული საქმის კეთებისთვის დასანქცირებული TV-იმედის ამ თანამშრომლებისა და მათი მფარველების სამსახურში. იმის მაგივრად რომ მათ მიმართ აღეძრათ საქმე ჩემზე ფიზიკური ძალადობისა და მუქარის ფაქტზე , აქეთ მე დამაპატიმრეს. ამიწიოკეს 84წლის, ლოგინს მიჯაჭვული დედა, შემიშინეს მცირეწლოვანი შვილები და გამომკეტეს გლდანის ციხეში, სადაც მუხლის საშინელი ტკივილების მიუხედავად არ გადავყავარ შესაბამის კლინიკაში ოპერაციისთვის.

საბედნიეროდ ამ პატარა, ბოროტ კაცუნებთან უთანასწორო ბრძოლაში, მე მხოლოდ ერთი იარაღი გამაჩნია, ჩემი უშიშარი და მამაცი გული და რა თქმა უნდა ამ ბოროტებას პირწმინდათ დავამარცხებ,”-წერს ელიზბარაშვილი  .

29.09.2026

თ. ელიზბარაშვილი

შეგახსნებთ, რომ 3 სექტემბერს პროკურატურამ მას მუქარის ფაქტზე ბრალი წაუყენა.  4 სექტემბერს თბილისის საქალაქო სასამართლომ მას აღკვეთის ღონისძიების სახით პატიმრობა შეუფარდა.

• Share Post
• Twitter
• Facebook
• Google +1
• Email