9 იანვარს, ერთი დღით სამგზავრო აბონემენტების გაცემა შეჩერდა. მიზეზი ბარათზე დატანილ ტექსტში დაშვებული შეცდომა იყო.
„ ვადიანი სამგზავრო აბონემენტების დამზადებას და რეალიზაციას საქართველოს ბანკის შვილობილი კომპანია „მს+“ უზრუნველყოფს. სამწუხაროდ, ამ კომპანიის მიერ დაშვებული იყო მცირედი უზუსტობა. ბარათზე დატანილ ტექსტში კი დაშვებული იყო მექანიკური შეცდომა. სწორედ ამის გამო, დღეს, 9 იანვარს, ერთი დღით შეჩერდა აბონემენტების გაცემა. უკვე ხვალიდან, 10 იანვრიდან კი განახლდება ბარათის სწორი ვერსიის გაცემა“, – განმარტავენ „საქართველოს ბანკში“.
მოქალაქეები, რომლებმაც უკვე შეიძინეს სამგზავრო ბარათი, ხვალიდან მის გამოცვლას სრულიად უფასოდ შეძლებენ და აბონემენტის სწორ ვერსიას მიიღებენ.
„საქართველოს ბანკი“ შექმნილი დისკომფორტის გამო მოქალაქეებს ბოდიშს უხდის.
