საქართველოში, ხელოვნური სუნთქვის აპარატზე მყოფი პაციენტების, საშუალოდ 70-80% გარდაიცვალა ! 

ილიას სახელმწიფო უნივერსიტეტის დროითი მწკრივების ანალიზის ჯგუფმა, COVID-19 ეპიდემიის  ბოლო დროინდელი მიმდინარეობის  შესახებ რამდენიმე დამატებითი დასკვნა გამოაქვეყნა.

” მიმდინარე 2 კვირის ანალიზი  შეივსო დამატებითი შედეგებით, რაც უფრო სრული სურათის დანახვის საშუალებას იძლევა”,-ამის შესახებ, ჯგუფის წევრი, პროფესორები,  გრიგოლ ღოღობერიძე და ბიძინა შერგელაშვილი წერენ.

 მიმდინარე კვირის კვლევითი აქტივობებით ორი მნიშვნელოვანი რამ გაირკვა:

1) საქართველოში მიმდინარე ეპიდემიის პირველი ტალღის დროს რეანიმაციაში ხელოვნური სუნთქვის აპარატზე მყოფი პაციენტების მკურნალობის პროცესი უმრავლეს შემთხვევაში (საშუალოდ 70-80%) ლეტალურად მთავრდებოდა.

საინტერესოა, ამ მახასიათებლის მნიშვნელობების მონიტორინგის გაგრძელება და იმ მიზეზების გარკვევა, რამაც გამოიწვია ასეთი შედეგები. ეს მნიშვნელოვანია, ამ მაჩვენებლის გასაუმჯობესებლად. განსაკუთრებით იმ პირობებში, რომ სავარაუდოდ მოსალოდნელია ვირუსის ახალი სახეობის გავრცელებასთან დაკავშირებული მორიგი ტალღა მომავალში.

2) როგორც რეპროდუქციის კოეფიციენტის მიმდინარე დინამიკა აჩვენებს, დეკემბრის ბოლოს ჩამოყალიბებული კლების ტენდენცია შენარჩუნებულია, თუმცა გარკვეული კორექტივები ამ დინამიკაში შეიძლება 24 დეკემბრიდან შეზღუდვების ნაწილობრივ შემსუბუქებამ შეიტანოს. მაგრამ, გარდა ამისა, მთავარი დასკვნა ის არის, რომ როგორც ჩანს, ახალი სახეობის გავრცელება არ არის ჯერჯერობით ისეთი მასშტაბური, რომ სტატისტიკურად შესამჩნევი გამხდარიყო.

ეს კარგია, რადგან არის დრო მოსამზადებლად და იმ ღონისძიებების შესამუშავებლად, რომლებმაც მომავალში (თუკი ახალი სახეობის გავრცელება გახდა დომინირებადი) უნდა გახადონ შესაძლებელი რეპროდუქციის მაჩვენებლის იმდენად მართვა, რომ ის არასოდეს არ გაიქცეს 1-ზე მნიშვნელოვნად მაღლა, მიუხედავად ახალი სახეობის გაცილებით სწრაფად გავრცელების უნარისა.